Veteran sərəncamı 3729 nəfəri əhatə edir
Əmək və Əhalinin Sosial Müdafiəsi Nazirliyi prezident İlham Əliyevin 26 aprel sərəncamının icrasına başlayıb.
Sərəncam 1941-1945-ci illərin müharibəsində iştirak etmiş şəxslərə 1500 manat, İkinci Dünya müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, İkinci Dünya müharibəsi illərində döyüş cəbhələrinin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçilərinə, İkinci Dünya müharibəsi dövründə Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə, habelə Leninqrad şəhərinin mühasirəsi iştirakçılarına 750 manat birdəfəlik yardım verilməsini nəzərdə tutur.
Ödəniş Əmək və Əhalinin Sosial Müdafiəsi Nazirliyinə tapşırılıb. Nazirliyin rəsmi məlumatına görə, sərəncam ümumilikdə 3729 nəfərə şamil olunacaq. Onların 57-si İkinci Dünya müharibəsi iştirakçısı, 3672-si sənəddə nəzərdə tutulan digər şəxslərdir.
1939-cu ildə Almaniya və müttəfiqləri İkinci Dünya müharibəsinə başlayıb. 1941-ci ildə Almaniya SSRİ-yə hücum edib, bu müharibə 1945-ci il mayın 9-da SSRİ və müttəfiqlərinin qələbəsi ilə bitib. Həmin müharibədə Azərbaycandan 600 mindən çox adam döyüşüb, onların təxminən yarısı həlak olub.
