İcbari tibbi sığorta: illik hesabat yayılıb
İcbari Tibbi Sığorta üzrə Dövlət Agentliyi hesabat yayıb. Məlumata görə, 2022-ci ildə 4 milyon 557 min 8 şəxsə icbari tibbi sığorta çərçivəsində tibbi xidmət göstərilib. 17 milyon 836 min 873 müraciətin, 44 milyon 136 min 303 tibbi xidmətin qeydə alındığı bildirilir.
Ən çox müraciət ümumi tibbi müayinə, endokrin, qan dövranı, tənəffüs və həzm sisteminin xəstəlikləri üzrə rəsmiləşib.
Azərbaycanda 2020-ci ilin yanvarından tətbiq olunan icbari tibbi sığorta 2021-ci ilin aprelindən bütün ölkəni əhatə edir.
Novator.az bildirir ki, işəgötürən və işçilər aylıq hesablanmış əməyin ödənişi fondunun 8000 manata qədər hissəsindən 2 faiz, 8000 manatdan yuxarı hissəsindən 0,5 faiz miqdarında icbari tibbi sığorta haqqı verir.
Mülki hüquqi xarakterli müqavilələr əsasında işləri (xidmətləri) yerinə yetirən fiziki şəxslər üzrə aylıq gəlirlərinin 8000 manatadək hissəsinin 2 faizi, 8000 manatdan yuxarı hissəsinin 1 faizi miqdarında icbari tibbi sığorta haqqı var.
Vergi ödəyicisi kimi vergi uçotuna alınmış fiziki şəxslər üzrə minimum aylıq əməkhaqqının (hazırda 345 manatdır) 4 faizi miqdarında icbari tibbi sığorta haqqı qüvvədədir.
