Özbəkistan prezidentinə yeni yol açılır
Aprelin 26-sı Özbəkistanda konstitusiya referendumunun erkən səsverməsində son gündür. Erkən səsvermə aprelin 19-da başlayıb. Əsas səsvermə aprelin 30-na təyin olunub.
Novator.az bildirir ki, ana qanuna dəyişikliklər layihəsi Özbəkistan Ali Məclisinin Senatının və Qanunverici Palatasının səlahiyyətlərini yeniləyir. Təklifə görə, heç kim ardıcıl olaraq iki dəfədən artıq Senatın və aşağı palatanın sədri seçilə bilməz.
Prezidentin səlahiyyət müddəti 5 ildən 7 ilə qaldırılır, indiki dövlət başçısına yenidən seçilmək imkanı yaradılır.
Özbəkistanda prezident idarə üsulu 1990-cı ildən tətbiq olunur. 1989-cu ildə Özbəkistan Kommunist Partiyası Mərkəzi Komitəsinin birinci katibi – respublika rəhbəri seçilən İslam Kərimov 1990-cı ildə parlamentin qərarı ilə prezident vəzifəsinə gətirilib və 2016-cı il sentyabrın 2-də vəfat edənə qədər dövlət başçısı kürsüsündə qalıb.
Hazırda prezident postunu Şövkət Mirziyayev tutur.
1957-ci il təvəllüdlü Şövkət Mirziyayev 2003-cı il dekabrın 12-dən baş nazir olub, 2016-cı il sentyabrın 8-dən prezident səlahiyyətlərini icra edib, dekabrın 4-də prezident seçilib.
Şövkət Mirziyayev 2021-ci ildə erkən səsverməsi 14-20 oktyabr arası, əsas səsverməsi oktyabrın 24-də keçirilmiş prezident seçkisində də qalib gəlib.
