Hesablama Palatası 2022-ci ilə nöqtə qoydu
Hesablama Palatası 2022-ci ilin hesabatını verib. Milli Məclisin 25 aprel iclasında hesabatı palata sədri Vüqar Gülməmmədov təqdim edib. O, 2022-ci ildə 5 səmərəlilik auditi, 9 maliyyə auditi, 28 uyğunluq auditinin keçirildiyini bildirib.
Ümumi uyğunluqdan kənarlaşma 530,1 milyon manat, maliyyə hesabatlarında mahiyyətə təsir edən təhrif məbləği 564,5 milyon manat, uçota dair tələblərin pozulması ilə bağlı təhrif məbləği 233,3 milyon manat göstərilir.
Hesablama Palatası Milli Məclisin yaratdığı, kənar dövlət maliyyə nəzarətini həyata keçirən ali audit orqanıdır. Qurumun icmal büdcənin, o cümlədən dövlət büdcəsinin və büdcədənkənar dövlət fondlarının (təsisatlarının) büdcələrinin layihələrinə və icrasına rəy vermək səlahiyyətləri var.
Palata sədr, sədr müavini və 5 auditordan ibarətdir. Üzvlərin səlahiyyət müddəti 7 ildir, onlar Milli Məclis sədrinin təqdimatı əsasında təyin olunurlar.
Vüqar Gülməmmədov quruma 2013-cü ildən sədrlik edir.
