Bayden bəyan etdi: “Yenidən seçilmək istərdim”
Cozef Bayden ABŞ prezidenti kürsüsündə qalmaq niyyətindədir. Novator.az saytı “Reuters” agentliyinə istinadla bildirir ki, aprelin 25-də rəsmi açıqlama yayan dövlət başçısı 2024-cü il noyabrın 5-də keçiriləcək prezident seçkisində namizəd olacağını bəyan edib: “Hər bir nəslin ömrünə demokratiyanı, azadlıqları qorumaq anı qismət olur. Bu azadlıqlar bizimdir. Buna görə yenidən prezident seçilmək istərdim”.
Cozef Bayden 1942-ci il noyabrın 20-də doğulub. Delaver Universitetində tarixçi və politoloq ixtisasları alıb, həmçinin Sirakus Universitetinin Hüquq Məktəbini bitirib.
7 dəfə ABŞ Konqresinin yuxarı palatası olan Senatın üzvü seçilib, qurumun Məhkəmə və Xarici Əlaqələr komitələrinə sədrlik edib.
2009-2017-ci illərdə vitse-prezident postunu tutub.
Demokratlar Partiyasının üzvü olan Cozef Bayden 2020-ci il noyabrın 3-də keçirilmiş ümumxalq səsverməsində 538 nəfərlik Seçicilər Kollegiyasına 306 nümayəndə qazanıb. Seçicilər Kollegiyasındakı 14 dekabr 2020-ci il səsverməsi də eyni nəticə ilə yekunlaşıb. 2021-ci il yanvarın 7-də Senatın və Konqresin alt qanadı olan Nümayəndələr Palatasının birgə iclasında Seçicilər Kollegiyasındakı səsvermənin nəticəsi – Cozef Baydenin prezident seçilməsi təsdiqlənib. Yanvarın 20-də Cozef Bayden and içərək prezident səlahiyyətlərinin icrasına başlayıb.
Mənbə: Reuters.com
