6 ölkə, 12 komanda
UEFA-nın klub turnirlərində 2022-2023 mövsümü yarımfinallara yetişib. Novator.az bildirir ki, mübarizəni 6 ölkənin 12 komandası davam etdirir: Çempionlar Liqası, Avropa Liqası və Konfrans Liqasının hər birində 4 komanda yer alır. İtaliya turnirlərdə 5, İngiltərə və İspaniya 2, Almaniya, Niderland və İsveçrə 1 komanda ilə təmsil olunur.
Çempionlar Liqasındakı komandaların 3-ü titul sahibidir. 1955-ci ildən keçirilən, 1992-ci ilə qədər Çempionlar kuboku adlanmış turnirdə “Real” 14, “Milan” 7, “İnter” (İtaliya) 3 zəfər qazanıb.
Avropa Liqasındakı 3 komandanın turnirdə qələbəsi var. 1971-ci ildən keçirilən, 2009-cu ilədək UEFA kuboku adlanmış turnirdə “Sevilya” 6, “Yuventus” 3, “Bayer” 1 uğur əldə edib.
2021-ci ildən keçirilən Konfrans Liqasının yeganə qalibi “Roma” Avropa Liqasında yarışır.
55 üzvü olan UEFA-nın klub reytinqinə İngiltərə başçılıq edir. Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Qrup mərhələsi və sonrakı raundlar üçün 1-5 arası bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
