Yeni siyasi məhbus siyahısı yayılıb
Hüquq müdafiəçiləri Leyla Yunus və Elşən Həsənov yeni siyasi məhbus siyahısı yayıb. “Turan”ın 20 aprel məlumatına görə, siyasi məhbus sayılan 182 nəfər siyahıda 7 qrupa bölünüb: 118 inanclı, “Gəncə işi” üzrə tutulan 26 nəfər, 13 ömürlük məhkum, “Tərtər işi” üzrə tutulan 8 nəfər, 6 jurnalist və bloqçu, müxalif partiyaların və hərəkatların 6 üzvü, Almaniyadan deportasiya olunmuş 5 sabiq siyasi mühacir.
Avropa Şurasının meyarlarına əsasən, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
2017-ci ildə əsasən Tərtər istiqamətində bir qrup hərbi qulluqçu və mülki şəxs düşmən kəşfiyyatı ilə məxfi əməkdaşlıq ittihamı ilə tutulub.
Bir qrup şəxs 2018-ci ildə Gəncənin icra başçısına qəsdə, şəhərdə iki polis zabitinin həlak olmasına gətirən hadisələrə görə tutulub.
