Sərmayədə mənbə, istiqamət
2023-cü ilin yanvar-mart aylarında xarici ölkələr və beynəlxalq təşkilatların Azərbaycanda yatırdığı investisiyanın 96,7 faizi Böyük Britaniya, Fransa, ABŞ, Türkiyə, Yaponiya, İsveçrə, Rusiya, Norveç və İran sərmayədarlarına məxsus olub. Novator.az-ın məlumatına görə, hesabatı yayan Dövlət Statistika Komitəsi birinci rübdə qoyulan ümumi sərmayəni 3 milyard 523,1 milyon manat göstərir: “Vəsaitin 55,1 faizi məhsul istehsalı sahələrinin, 39,6 faizi xidmət sahələrinin, 5,3 faizi yaşayış evlərinin tikintisinin payına düşüb. Sərmayədə müəssisə və təşkilatların öz vəsaitləri 1 milyard 615,1 milyon manat, büdcə vəsaitləri 1 milyard 373,3 milyon manat, əhalinin şəxsi vəsaitləri 225,8 milyon manat, bank kreditləri 144,9 milyon manat, sair vəsaitlər 164 milyon manat olub”.
Başqa bir hesabata əsasən, statistik vahidlərin (fərdi sahibkarlar istisna olmaqla) sayı aprelin 1-nə 186693-ə çatıb: “Reyestrdə qeydiyyatdan keçmiş statistik vahidlərdən tam xarici investisiyalı və birgə müəssisələri əsasən Türkiyə, İran, Rusiya, Böyük Britaniya, ABŞ və Almaniya təmsilçiləri yaradıb”.
