Yeni təzminat öhdəlikləri
Avropa İnsan Hüquqları Məhkəməsi aprelin 13-də Azərbaycandan şikayətlər üzrə qərardadlar açıqlayıb. Hüquqşünas Xalid Ağalıyev yazır ki, 6 ərizəçinin şikayətində Avropa İnsan Hüquqları Konvensiyası ilə qorunan toplaşmaq və ədalətli məhkəmə araşdırması hüquqlarının pozulduğu iddia olunub. Dövlətlə anlaşma hər ərizəçiyə 2850 avro təzminat ödənməsini nəzərdə tutur.
20 ərizəçi ədalətli məhkəmə araşdırması, azadlıq və toxunulmazlıq hüquqlarının pozuntusuna məruz qaldıqlarını iddia ediblər. Dövlətin təqdim etdiyi bəyannamə əsasında 1 şikayətçiyə 2250 avro, 19 ərizəçinin hər birinə 1250 avro təzminat ödənəcək.
Digər 3 ərizəçi də ədalətli məhkəmə araşdırması, azadlıq və toxunulmazlıq hüquqlarının pozulduğunu iddia ediblər. Dövlətlə anlaşmaya əsasən, 1 nəfərə 1250 avro, 2 nəfərin hər birinə 2250 avro təzminat ödənməlidir.
9 ərizəçi toplaşmaq, azadlıq və toxunulmazlıq hüquqlarının pozuntusundan şikayət veriblər. Dövlətlə anlaşma 2 ərizəçinin hər birinə 4150 avro, 7 ərizəçinin hər birinə 2850 avro təzminat ödənməsini rəsmiləşdirib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
