“Qarabağ”dan finala
Azərbaycanın “Qarabağ” komandası 2014-cü ildən başlayaraq UEFA-nın klub turnirlərində əsas mərhələlərdə çıxış edib. Novator.az bildirir ki, komanda 2014-2015, 2015-2016, 2016-2017, 2018-2019, 2019-2020, 2020-2021 mövsümlərində Çempionlar Liqasında start götürüb, sonra Avropa Liqasına adlayaraq qrup mərhələsində mübarizə aparıb.
2017-2018 mövsümündə komanda Çempionlar Liqasının qrup mərhələsində oynayıb.
2021-2022-ci il mövsümündə Konfrans Liqasında yarışan “Qarabağ” 1/16 finala qədər irəliləyib.
2022-2023 mövsümünə Çempionlar Liqasında başlayan “Qarabağ” əvvəl Avropa Liqasına adlayıb, sonra Konfrans Liqasına keçərək 1/16 finalda ələnib.
5 mövsümdə “Qarabağ”a rəqib olmuş komanda finala çıxıb:
– Avropa Liqasının 2014-2015 mövsümündə “Qarabağ”la eyni qrupda yarışmış “Dnepr” (Ukrayna) komandası həmin mövsüm finalda oynayıb;
– Çempionlar Liqasının 2017-2018 mövsümündə “Qarabağ”la eyni qrupda mübarizə aparmış “Atletiko” (İspaniya) Avropa Liqasına ələnib və finala çıxaraq turnirin qalibi olub;
– Avropa Liqasının 2018-2019 mövsümündə “Qarabağ”la eyni qrupda oynamış “Arsenal” (İngiltərə) komandası həmin mövsüm finala çıxa bilib;
– Avropa Liqasının 2019-2020 mövsümündə “Qarabağ”la eyni qrupda yer almış “Sevilya” (İspaniya) həmin mövsüm finala qədər gedərək zəfər kubokunu başı üzərinə qaldırıb;
– Avropa Liqasının 2020-2021 mövsümündə “Qarabağ”la eyni qrupda oynamış İspaniya “Vilyarreal”ı finala çıxaraq turnirin qalibi olub.
2022-2023 mövsümündə “Qarabağ”a rəqib olmuş komandaların 2-si mübarizədə qalır. Çempionlar Liqasının birinci mərhələsində “Qarabağ”ın ələdiyi Polşanın “Lex” komandası indi Konfrans Liqasının 1/4 finalındadır.
Konfrans Liqasının 1/16 finalında “Qarabağ”ı yenən Belçikanın “Gent” komandası 1/4 finaldadır.
