Daha bir partiya sıradan çıxdı
Yeni Yol Partiyası fəaliyyətini dayandırıb. Elan “Yeni Müsavat” qəzetinin 13 aprel sayında dərc olunub.
Novator.az bildirir ki, Yeni Yol Partiyası 1992-ci ildən fəaliyyət göstərən Azərbaycan Dirçəliş və Tərəqqi Partiyasının bazasında yaradılmış, 2022-ci ildə dövlət qeydiyyatına alınmışdı.
2023-cü ildə daha 8 partiya fəaliyyətinə son verdiyini açıqlayıb: Azərbaycan Azad Respublikaçılar Partiyası, Azərbaycan Liberal Demokrat Partiyası, Azərbaycan Naminə Alyans Partiyası, Azərbaycan Sosial Demokrat Partiyası, Azərbaycan Sosial Rifah Partiyası, Azərbaycan Təkamül Partiyası, Azərbaycan Vahid Kommunist Partiyası, Birlik Partiyası.
2023-cü il yanvarın 11-də qüvvəyə minən “Siyasi partiyalar haqqında” yeni qanuna görə, dövlət qeydiyyatı üçün partiyanın azı 5000 üzvü olmalıdır. Dövlət qeydiyyatında olan siyasi partiyalara üzvlərinin sayını 5000 min nəfərə çatdırmaq, onların reyestrini hazırlayıb təqdim etmək üçün 180 gün vaxt verilib. Həmin müddət iyulun 10-da bitir.
Əvvəlki qanunla partiyanın qeydiyyatı üçün 1000 üzv kifayət idi.
Partiyaların dövlət qeydiyyatına Ədliyyə Nazirliyi məsuldur.
