Türkiyə: bir partiya seçkidən çəkildi
Böyük Türkiyə Partiyası mayın 14-də, prezident seçkisi ilə eyni gündə keçiriləcək parlament seçkisindən çəkilib. Novator.az-ın məlumatına görə, aprelin 12-də namizədlərinin siyahısını Ali Seçki Qurumundan geri götürən partiya qoşa seçkidə Xalq ittifaqına dəstək verəcəyini bəyan edib.
Namizədlərin siyahısının Ali Seçki Qurumuna təqdimatı aprelin 9-da başa çatıb. Böyük Türkiyə Partiyası çıxandan sonra parlament seçkisində 25 partiyadan namizədlər qalır. Onların 12-si seçkiyə ayrılıqda gedir: Millət Partiyası, Haqq və Azadlıqlar Partiyası, Gənc Partiya, Məmləkət Partiyası, Ədalət-Birlik Partiyası, Ana Vətən Partiyası, Yenilik Partiyası, Xalqın Qurtuluş Partiyası, Milli Yol Partiyası, Vətən Partiyası, Güc Birliyi Partiyası, Müstəqil Türkiyə Partiyası.
13 partiya ittifaqlarda bir araya gəlib.
Sosialist Güc Birliyi ittifaqında Türkiyə Kommunist Partiyası, Türkiyə Kommunist Hərəkatı, Sol Partiya; Xalq ittifaqında Böyük Birlik Partiyası, Ədalət və İnkişaf Partiyası, Yenidən Rifah Partiyası, Milliyyətçi Hərəkat Partiyası; Əmək və Azadlıq ittifaqında Yaşıllar və Sol Gələcək Partiyası, Türkiyə Fəhlə Partiyası; Millət ittifaqında Cümhuriyyət Xalq Partiyası, Yaxşı Partiya; Ata ittifaqında Ədalət Partiyası, Zəfər Partiyası namizədlər verib.
Ali Seçki Qurumunun parlament seçkisinə buraxdığı bəzi partiyaların namizədləri başqa qurumların siyahısında yer alır.
600 nəfərlik Türkiyə Böyük Millət Məclisinə düşmək üçün ölkə üzrə etibarlı səslərin azı 7 faizini qazanmaq gərəkdir.
Millət vəkilliyinə müstəqil namizədlik də mümkündür.
Namizədlərin rəsmi siyahısı aprelin 19-da açıqlanacaq.
Prezidentliyə iddiaçılar bunlardır: dövlət başçısı, Ədalət və İnkişaf Partiyasının lideri Rəcəb Teyyub Ərdoğan – Xalq ittifaqının namizədi; Məhərrəm İncə – lideri olduğu Məmləkət Partiyasının namizədi; millət vəkili, Cümhuriyyət Xalq Partiyasının lideri Kamal Kılıçdaroğlu – Millət ittifaqının namizədi; müstəqil siyasətçi Sinan Oğan – Ata ittifaqının namizədi.
İlk turda prezident seçilmək üçün etibarlı səslərin 50 faizindən çoxunu almaq tələb olunur, əks halda ən çox səs yığmış iki namizəd ikinci tura (28 may) çıxır.
Türkiyədə seçki marafonu, ilkin iddiaçılar
Türkiyə prezidentliyinə namizədlər
Türkiyə: dördlüyün yolu açıldı
