Sərhəd komissiyasına katib təyin edilib
Azərbaycanla Ermənistan arasında sərhədin delimitasiyası üzrə dövlət komissiyasının katibliyinə katib təyin olunub: Murad Nəcəfbəyli. APA-nın 12 aprel məlumatına görə, sərəncamı baş nazir Əli Əsədov imzalayıb.
Dövlət komissiyası prezidentin 23 may 2022-ci il sərəncamı ilə yaradılıb. Quruma baş nazirin müavini Şahin Mustafayev sədrlik edir.
Nazirlər Kabinetinin 12 oktyabr 2022-ci il qərarı komissiyanın cari fəaliyyətinin təşkili məqsədilə katibliyin yaradılmasını nəzərdə tutub. Katiblik Nazirlər Kabineti Aparatında şöbə hüququndadır.
Ermənistan 1988-1994-cü illərin təcavüzündə Azərbaycanın altıda birini işğal edərək Yuxarı Qarabağ bölgəsində separatçı rejim qurub.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlar nəticəsində ərazilərin böyük hissəsi azad olunub.
Yuxarı Qarabağ bölgəsindəki Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi separatçı rejimin, Ermənistana gedən Laçın yolu Rusiya hərbi kontingentinin nəzarətindədir.
Sədərək rayonunun 1, Qazax rayonunun 7 kəndi də işğalda qalır.
