Rəsmi nekroloq
Aprelin 9-da vəfat edən rejissor Azər Paşa Nemətov bu gün Bakıda, İkinci Fəxri xiyabanda dəfn olunub.
Rəsmi nekroloqda xalq artisti, professor Azər Paşa Nemətovun ölümünün Azərbaycan mədəniyyəti üçün ağır itki olduğu vurğulanır: “Azər Paşa Nemətov 1947-ci il avqustun 13-ü Bakıda doğulub. Azərbaycan Dövlət İncəsənət İnstitutunun rejissorluq fakültəsində ali təhsil alıb.
Əmək fəaliyyətinə 1967-ci ildə Dövlət Radio və Televiziya Verilişləri Komitəsində rejissor assistenti kimi başlayan Azər Paşa Nemətov 1970-1972-ci illərdə Azərbaycan Dövlət İncəsənət İnstitutunda assistent olub, 1973-1974-cü illərdə Azərbaycan Dövlət Gənc Tamaşaçılar Teatrında quruluşçu rejissor işləyib.
1974-1976-cı illərdə Leninqrad Gənc Tamaşaçılar Teatrında rejissor-stajor olaraq çalışdıqdan sonra 1977-ci ildə Bakıya qayıdaraq fəaliyyətini yenidən Azərbaycan Dövlət Gənc Tamaşaçılar Teatrında davam etdirib, 1990-cı ilədək quruluşçu rejissor, baş rejissor və bədii rəhbər vəzifələrində çalışıb, 1990-1992-ci illərdə Azərbaycan Dövlət Akademik Dram Teatrında quruluşçu rejissor olub, 2015-ci ildən Azərbaycan Dövlət Akademik Milli Dram Teatrının bədii rəhbəri – baş rejissoru, 2016-cı ildən teatrın bədii rəhbəri – direktoru vəzifəsini tutub.
Azər Paşa Nemətov 1992-ci ildən Azərbaycan Teatr Xadimləri İttifaqının İdarə Heyətinə sədrlik edib, uzun illər Azərbaycan Dövlət Mədəniyyət və İncəsənət Universitetində pedaqoji fəaliyyət göstərib.
Azər Paşa Nemətov 1987-ci ildə əməkdar incəsənət xadimi, 2002-ci ildə xalq artisti fəxri adlarını alıb, 2007-ci ildə “Şöhrət”, 2017-ci ildə 2-ci dərəcəli “Vətənə xidmətə görə”, 2022-ci ildə “Şərəf” ordenləri ilə təltif edilib”.
Nekroloq prezident İlham Əliyev, birinci vitse-prezident Mehriban Əliyeva, baş nazir Əli Əsədov, parlament sədri Sahibə Qafarova və başqa rəsmilərin adından yayılıb.
