Fazil Mustafa açıqlama yayıb
Böyük Quruluş Partiyasının başqanı, Milli Məclisin deputatı Fazil Mustafa aprelin 10-da özünün “Facebook” səhifəsində açıqlama yayıb. Novator.az-ın məlumatına görə, siyasətçi qeyd edir ki, səhhətində xeyli irəliləyiş var, bir neçə günə xəstəxanadan evə buraxılacaq: “Bu gün köməkçilərimə tapşırıq verdim ki, hər həftə olduğu kimi Bakıxanov qəsəbəsindəki ofisimdə seçiciləri qəbul edib müraciətlərini mənə çatdırsınlar. Gələn həftədən evdən seçicilərin onlayn qəbulunu keçirməyi nəzərdə tuturam”.
Martın 28-i axşam Bakıda, Zabrat qəsəbəsindəki evinin yaxınlığında Fazil Mustafaya avtomat silahdan atəş açılıb. Çiynindən və ayağından iki güllə yarası alan Fazil Mustafa hüquq mühafizə qurumlarından birinin hospitalında müalicə alır.
Dövlət Təhlükəsizliyi Xidmətinin İstintaq Baş İdarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanıb.
Aprelin 3-də qəsddə şübhəli bilinən 4 nəfərin müəyyən olunaraq tutulduğu xəbəri yayılıb.
1965-ci il təvəllüdlü Fazil Mustafa Bakı Dövlət Universitetinin hüquq fakültəsini bitirib.
Azərbaycan Xalq Cəbhəsi (AXC) sədrinin müşaviri, AXC Analitik Mərkəzinin rəhbəri, Prezident Aparatının dövlət-hüquq şöbəsinin müdiri, AXC sədrinin Türkiyə təmsilçisi olub. 2000-ci ildə Azərbaycan Xalq Cəbhəsi Partiyası parçalananda “klassiklər” qanadında fəaliyyət göstərib.
2003-cü ildən Böyük Quruluş Partiyasının başqanıdır.
2005, 2010, 2015 və 2020-ci illərdə Milli Məclisin deputatı seçilib. O, parlamentdə 26 saylı Sabunçu seçki dairəsini təmsil edir.
