Qəbələdə görüş
Gürcüstanın baş naziri İrakli Qaribaşvili aprelin 7-də Azərbaycana işgüzar səfərə gəlib. Qəbələnin hava limanında ali qonağı xarici işlər naziri Ceyhun Bayramov və digər rəsmi şəxslər qarşılayıb.
AZƏRTAC xəbər verir ki, Qəbələdə prezident İlham Əliyevin İrakli Qaribaşvili ilə təkbətək görüşü keçirilib. Görüşdən sonra İlham Əliyev və İrakli Qaribaşvili mətbuata bəyanatlarla çıxış ediblər.
Həmin gün İrakli Qaribaşvili Qəbələ şəhəri ilə tanış olub, İlham Əliyevlə birgə Qəbələ regional “ASAN xidmət“ mərkəzinə, Qəbələ Qida Şəhərciyinə baş çəkib.
1982-ci il təvəllüdlü İrakli Qaribaşvili hakim Gürcü Arzusu – Demokratik Gürcüstan Partiyasının qurucularındandır. 2012-2013-cü illərdə daxili işlər naziri, 2013-2015-ci illərdə baş nazir olub, 2019-cu ildən müdafiə naziri postunu tutub, 2021-ci ildə baş nazirliyə qayıdıb.
