Azərbaycan Dünya Bankının yoxsulluq güzgüsündə
İqtisadçı Rövşən Ağayev Dünya Bankının Avropa və Mərkəzi Asiya üzrə yeni iqtisadi hesabatına nəzər salıb. Novator.az-ın məlumatına görə, ekspert yazır ki, hesabat zəif iqtisadi artım şəraitində yüksək inflyasiyanın səbəb olduğu yaşayış xərclərinin artımına həsr edilib: “Hesabat müəllifləri yaşayış xərcləri indeksi əsasında region ölkələrinin müqayisəsini aparıb – yəni hansı ölkədə yaşayış xərcləri daha çox artıb. Yaşayış xərcləri indeksi fərqli gəlir qrupundan olan ev təsərrüfatlarının yaşayışının dəyərində baş verən dəyişiklikləri daha dəqiq ölçür. İnflyasiya fərqli əhali qruplarının istehlakında fərqli mal (xidmət) qruplarının xüsusi çəkisini nəzərə almadan orta statistik istehlakçı üçün qiymətlərin necə dəyişdiyini əks etdirir. Yaşayış xərcləri indeksi qiymətlərin dəyişməsi ilə paralel istehlakda mal və xidmətlərin xüsusi çəkisini də nəzərə alır. Məsələn, sürətli bahalanma üzündən kasıb əhali daha ucuz və az keyfiyyətli məhsullar almağa keçirsə, yaşayış xərcləri indeksi buna diqqət yönəldir.
Hesabata görə, 2022-ci ilin dekabrında Azərbaycanda illik inflyasiya 14,4 faiz təşkil etdiyi halda yaşayış xərclərinin orta artımı 15,4 faiz olub, ən yoxsul əhali qrupları üzrə yaşayış 15,9 faiz, ən zəngin qruplar üzrə 14,1 faiz bahalanıb.
Gürcüstan və Ermənistan üzrə orta göstərici 11,1 və 8,8 faizdir.
Hesabat müəlliflərinə görə, inflyasiya əsasında hesablanan yoxsulluq göstəricisi ilə müqayisədə yaşayış xərcləri indeksi əsasında hesablanan göstərici arasında fərq olur. Azərbaycan 1,7 faiz fərqlə Avropa və Mərkəzi Asiyada ilk yerdə gəlir. Yəni yaşayış xərcləri indeksi nəzərə alınsa, yoxsulluq göstəricisi daha yüksək alınır”.
