Avropa Şurası: Azərbaycan ən intizamsız ölkə sayılır
Aihmaz.org-un 6 aprel məlumatına görə, Avropa İnsan Hüquqları Məhkəməsinin Azərbaycandan şikayətlər üzrə çıxardığı 285 hələ qərar icra olunmayıb. Avropa Şurası Nazirlər Komitəsinin 2022-ci il hesabatında Azərbaycan qərarları ən pis icra edən ölkə kimi göstərilir: “Azərbaycan indiyə qədər 90 qərarı icra edib. Bu, ümumi qərarların 24 faizi deməkdir”.
İntizamsız ölkələr siyahısında sonrakı yerləri tutan Rusiyanın (2022-ci ildə Avropa Şurasından ayrılıb) Avropa Məhkəməsi qərarlarının 36,8 faizini, Gürcüstanın 58,3 faizini icra etdiyi bildirilir.
Qərarları ən yaxşı icra edən ölkələr arasında Andorra, Lixtenşteyn, Avstriya və Sloveniya yer alır.
Novator.az bildirir ki, Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
Avropa İnsan Hüquqları Konvensiyasına görə, Avropa Şurasının Nazirlər Komitəsi ölkənin Avropa İnsan Hüquqları Məhkəməsinin qərarını yerinə yetirməkdən boyun qaçırdığını hesab edirsə və məhkəmə bunun pozuntu olduğunu təsdiqləyirsə, onda iş tədbir görülməsi üçün Nazirlər Komitəsinə göndərilir. Tədbirlərdən biri ölkənin Avropa Şurasından çıxarılması ola bilər.
