Finlandiyada hökumət dəyişikliyi rəsmiləşir
Finlandiyanın baş naziri Sanna Marin istefa verir. Novator.az-ın məlumatına görə, Sosial Demokrat Partiyasına liderlik edən hökumət başçısı aprelin 2-də keçirilmiş parlament seçkisinin nəticələrini nəzərə alaraq belə addım atır.
Ölkədə hökumət parlament seçkisinin nəticələri əsasında formalaşır. 1985-ci il təvəllüdlü Sanna Marin 2019-cu ildən baş nazir postundadır. Sosial Demokrat Partiyası həmin ilin parlament seçkisində üstün gələrək Mərkəz Partiyası, Yaşıl İttifaq bloku, Sol İttifaq və İsveç Xalq Partiyası ilə koalisiya hökuməti qurub.
Finlandiyanın yeni parlamentində qüvvələr nisbəti başqadır. 2 aprel seçkisində 200 nəfərlik qanunverici orqana Milli Koalisiya Partiyası 48, Əsl Finlər Partiyası 46, Sosial Demokrat Partiyası 43 mandatla düşüb.
Mərkəz Partiyasının 23, Yaşıl İttifaq blokunun 13, Sol İttifaqın 11, İsveç Xalq Partiyasının 10, Xristian Demokrat Partiyasının 5, “İndi” hərəkatının 1 mandatı var.
Mənbə: Reuters.com
