Mərkəzi Bankın hesabatından nələr görünür?
İqtisadçı Rövşən Ağayev Mərkəzi Bankın 2022-ci il üzrə ödəmələr balansı statistikasına nəzər salıb. Novator.az-ın məlumatına görə, o yazır ki, cari hesablar balansında 23,5 milyard dollar artıqlıq, maliyyə hesabında 12,5 milyard dollar defisit yaranıb, dəqiq uçota alınmayan məbləğ də nəzərə alındıqda ölkədən 14,1 milyard dollar xalis kapital çıxışı qeydə alınıb, tədiyyə balansının ümumi müsbət saldosu 9,3 milyard dollar göstərilib.
Ekspert cari hesablar balansında yaranan artıqlığın əsasən neft-qaz sektorunun hesabına təmin edildiyini vurğulayır: “Bu hesabın neft-qaz bölməsi üzrə 28,7 milyard dollar artıqlıq, qeyri-neft bölməsi üzrə 5,2 milyard dollar defisit yaranıb. Defisitin məbləği xidmətlər balansı üzrə 1,4 milyard dollara, ilkin gəlirlər balansı üzrə 5,9 milyard dollara yaxındır. Fiziki şəxslərin adına xaricdən gələn pul baratlarının 4 dəfəyə yaxın artımı sayəsində təkrar gəlirlər balansında da 2,9 milyard dollarlıq artıqlıq rəsmiləşib”.
