İctimai birlikdən İran xəbərdarlığı
Vətən Fədailəri İctimai Birliyi bəyanat yayıb. Bəyanatda qeyd olunur ki, qurumun başlıca qayəsi Azərbaycanın ərazi bütövlüyü və suverenliyinin təmin olunması, buna qarşı hərəkətlərin qarşısının alınması işində dövlətə dəstəkdir: “Biz bu yolda vətənimizin və millətimizin maraqlarından çıxış edir və gərəkli halda canımızı fəda etməkdən çəkinməyəcəyimizi bəyan edirik. Ölkəmiz üçün həssas durumlarda, o cümlədən Vətən müharibəsi və ondan sonrakı dönəmlərdə apadığımız ədalətli mücadilədə yanımızda olan, bizlərə ən azı mənəvi dəstək olan dövlətlərə və millətlərə dost gözü ilə baxır, onlara minnət borcumuzu bildiririk.
Düşmənimizə hər cür siyasi-hərbi dəstək göstərməklə haqlı davamıza qarşı çıxanların, xüsusən də İran rejiminin davranışlarını isə pisləyirik. Bu bir faktdır ki, İran rejimi ölkəmizə qarşı mehriban qonşuluğa söykənməyən ənənəvi davranışları ilə hazırda daha da irəli gedərək açıq şəkildə anti-Azərbaycan mövqeyi sərgiləyir və ölkəmizi hərbi təcavüzlə təhdid etməkdən belə çəkinmir. Əzəli torpaqlarımızın böyük bir hissəsinin İranın tərkibində, 30 milyondan artıq həmvətənimizin İranın girovluğunda olması halı bizlərdən İran rejiminin hazırkı davranışlarına daha ehtiyatlı və həssas yanaşmağı tələb edir. Başlıca təhlükə mənbələrindən biri insanların dini inancından istifadə edilməsi ilə ölkəmizə qarşı müəyyən təxribatların törədilməsi ehtimalı ola bilər. Ona görə də dinindən və dilindən asılı olmayaraq hər birimiz vətənimizin maraqlarını üstün tutmalı, gözlənən təxribatlara getməməli, həmçinin əks tərəfin inanclı insanlarımızdan istifadəsinə zəmin yaratmamalıyıq”.
Vətən Fədailəri İctimai Birliyinin əsası 2020-ci ildə qoyulub. Qurumun təsisçiləri Birinci Qarabağ müharibəsinin veteranları Yavər Hüseyn, Fəxrəddin Səfərov, Ələmşah Rəhimovdur.
