Borca faiz: yenilik imzalandı
Mülki Məcəlləyə dəyişikliklər martın 31-də prezident İlham Əliyevin imzası ilə dərc olunub. Qanun dərc edildiyi gündən 6 ay sonra qüvvəyə minir.
Novator.az bildirir ki, əsas yeniliklərdən birinə görə, borclu pul məbləğinin ödənməsini gecikdirdikdə kreditor gecikdirilmiş vaxt üçün gecikdirilmiş məbləğə illik beş faizin ödənməsini tələb edə bilər. Faizlər, o cümlədən gecikdirilmiş vaxt üçün hesablanan faizlər və digər haqlar yalnız borcun qaytarıldığı günədək ödənməmiş əsas borc qalığı məbləğinə hesablanır.
Borc müqaviləsi üzrə faizlər illik faiz dərəcəsinin üç yüz altmış beşə və ya borc müqaviləsində nəzərdə tutulduğu halda üç yüz altmışa bölünərək, borcun verildiyi faktiki günlərin (borcun verildiyi gün daxil, qaytarıldığı gün isə xaric olmaqla) sayına vurulmaqla hesablanır.
Borc müqaviləsi predmetinin məbləği üç min manatdan çoxdursa və ya müqavilənin iştirakçılarından biri hüquqi şəxsdirsə, borc müqaviləsi yazılı formada bağlanmalıdır.
