Xarici valyuta satışı 5 dəfə azalıb
Mərkəzi Bankın yaydığı pul siyasəti icmalına görə, 2022-ci ildə nağdsız valyuta bazarında əməliyyatların həcmi əvvəlki ilə nəzərən 13,9 faiz artaraq 31,7 milyard ABŞ dolları ekvivalentində olub, əməliyyatların 83,4 faizi ABŞ dollarında, 16,6 faizi başqa valyutalarda aparılıb.
Bankların nağd xarici valyuta əməliyyatlarının həcmi 5,1 milyard ABŞ dolları ekvivalentində göstərilir. Bunun 85,7 faizinin ABŞ dolları ilə aparılmış əməliyyatların payına düşdüyü, xalis xarici valyuta satışının 2021-ci illə müqayisədə 5 dəfə azaldığı vurğulanır.
Hesabata əsasən, 2022-ci ildə manatın ABŞ dollarına nəzərən rəsmi məzənnəsi dəyişməyib, avroya, Türkiyə lirəsinə, İngiltərə funt sterlinqinə, Qazaxıstan təngəsinə, Yaponiya yeninə, İsveçrə frankına, Ukrayna qrivnasına qarşı artıb, Rusiya rubluna və Gürcüstan larisinə qarşı düşüb, manatın qeyri-neft ümumi ticarət çəkili nominal effektiv məzənnəsi 8,4 faiz, real effektiv məzənnəsi 3,6 faiz möhkəmlənib.
Novator.az bildirir ki, 2015-ci ilin devalvasiyalarında ABŞ dollarının rəsmi kursu 0,7844 manatdan 1,5594 manata yüksəlib. 2016-cı ili 1,7707 manat, 2017-ci ili 1,7001 manatla yola salan dollar 2018-ci il martın 7-dən 1,7 manata təklif olunur.
Manat valyuta hərraclarında qorunur. Dövlət Neft Fondu Mərkəzi Bankın 2023-cü ilin yanvar-fevral aylarında keçirdiyi valyuta hərraclarında 545,1 milyon ABŞ dolları məbləğində vəsait satıb. Yanvarda fonddan 188,5 milyon dollar, fevralda 356,6 milyon dollar alınıb.
Analoji həcm 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard, 2021-ci ildə 6,7 milyard, 2022-ci ildə 4,7 milyard dollar göstərilib.
