Qazaxıstanın baş naziri postda qaldı
Martın 30-da Qazaxıstan prezidenti Qasım-Comərd Tokayev Əlixan Smailovu yenidən baş nazir təyin edib. Novator.az bildirir ki, qərar parlamentin aşağı palatasının – Məclisin razılığı ilə qəbul olunub.
Qazaxıstanda hökumət prezident və parlament qarşısında cavabdehlik daşıyır. Yeni seçilmiş Məclis fəaliyyətə başlayanda hökumət istefa verir. Prezident baş naziri Məclisin razılığı ilə təyin edir.
Martın 29-da Qazaxıstan Məclisinin yeni tərkibdə ilk iclası keçirilmiş, hökumət istefaya getmişdi.
Məclisə son seçki martın 19-da keçirilib. Rəsmi hesabata görə, hakim Amanat Partiyası 98 nəfərlik Məclisdə 62, Xalq Demokrat Partiyası 8, Respublika Partiyası 6, Demokrat Partiyası 6, Xalq Partiyası 5, Sosial Demokrat Partiyası 4 yer götürüb, 7 mandat partiyasız şəxslərə qismət olub.
1972-ci il təvəllüdlü Əlixan Smailov Prezident Administrasiyasının sektor müdiri, Statistika Agentliyinin sədri, xarici işlər nazirinin müavini, maliyyə nazirinin müavini, prezidentin köməkçisi postlarını tutub.
2018-ci ildən maliyyə naziri, 2019-cu ildən həmçinin baş nazirin birinci müavini olub, 2022-ci il yanvarın 5-dən hökumətə müvəqqəti rəhbərlik edib, yanvarın 11-də baş nazir təyin olunub.
