Qazaxıstan yeni hökumət astasında
Martın 29-da Qazaxıstan Məclisinin yeni tərkibdə ilk iclası keçirilib və hökumət istefaya gedib. Hakim Amanat Partiyasının baş nazir vəzifəsinə namizədi yaxın günlərdə irəli sürməsi gözlənir.
Novator.az bildirir ki, Məclis Qazaxıstan parlamentinin aşağı palatasıdır. Hökumət prezident və parlament qarşısında cavabdehlik daşıyır. Yeni seçilmiş Məclis fəaliyyətə başlayanda hökumət istefa verir. Prezident baş naziri Məclisin razılığı ilə təyin edir.
Məclisə son seçki martın 19-da keçirilib. Rəsmi hesabata görə, hakim Amanat Partiyası 98 nəfərlik Məclisdə 62, Xalq Demokrat Partiyası 8, Respublika Partiyası 6, Demokrat Partiyası 6, Xalq Partiyası 5, Sosial Demokrat Partiyası 4 yer götürüb, 7 mandat partiyasız şəxslərə qismət olub.
2022-ci il yanvarın 11-dən Qazaxıstanda baş nazir postunu Əlixan Smailov tutur.
1972-ci il təvəllüdlü Əlixan Smailov Qazax Dövlət Milli Universitetini bakalavr, Qazaxıstan Menecment, İqtisadiyyat və Proqnozlaşdırma İnstitutunu magistr dərəcəsi ilə bitirib.
Prezident Administrasiyasının sektor müdiri, Statistika Agentliyinin sədri, xarici işlər nazirinin müavini, maliyyə nazirinin müavini, prezidentin köməkçisi postlarını tutub.
2018-ci ildə maliyyə naziri təyin olunub, 2019-cu ildə həmçinin baş nazirin birinci müavini səlahiyyətlərini alıb, 2022-ci il yanvarın 5-dən hökumətə müvəqqəti rəhbərlik edib.
2019-cu il martın 20-dən Qazaxıstana Qasım-Comərd Tokayev prezidentlik edir.
