Fazil Mustafaya sui-qəsd
Martın 28-i axşam Bakıda siyasətçi, deputat Fazil Mustafaya sui-qəsd edilib. Zabrat qəsəbəsindəki evinin yaxınlığında siyasətçiyə avtomat silahdan atəş açılıb. Çiynindən və ayağından iki güllə yarası alan Fazil Mustafa Kliniki Tibbi Mərkəzə aparılıb.
Novator.az bildirir ki, Fazil Mustafa 19 oktyabr 1965-ci ildə Naxçıvan şəhərində doğulub. 1991-ci ildə Bakı Dövlət Universitetinin hüquq fakültəsini bitirib.
Azərbaycan Xalq Cəbhəsi (AXC) sədrinin müşaviri, AXC Analitik Mərkəzinin rəhbəri, Prezident Aparatının dövlət-hüquq şöbəsinin müdiri, AXC sədrinin Türkiyə təmsilçisi olub. 2000-ci ildə Azərbaycan Xalq Cəbhəsi Partiyası parçalananda “klassiklər” qanadında fəaliyyət göstərib.
2003-cü ildən Böyük Quruluş Partiyasının başqanıdır.
2005, 2010, 2015 və 2020-ci illərdə Milli Məclisin deputatı seçilib.
2008-ci ilin prezident seçkisində dövlət başçısı postuna namizəd olub.
Parlamentin mədəniyyət komitəsinin sədr müavinidir. Avropa Şurası Parlament Assambleyasında Azərbaycan nümayəndə heyətinin üzvüdür.
Fəlsəfə üzrə fəlsəfə doktorudur. Bir çox kitabın müəllifidir.
