Şotlandiyada Həmzə Yusif dönəmi
Martın 27-də Şotland Milli Partiyasına yeni lider seçilib: səhiyyə naziri Həmzə Yusif. O, birinci nazir – Şotlandiya hökumətinin başçısı postunu tutmaq hüququ qazanıb.
Novator.az bildirir ki, Həmzə Yusif 1985-ci ildə mühacir ailəsində doğulub. Atası pakistanlı, anası Cənubi Asiya əsilli keniyalıdır. Həmzə Yusifin Qərbi Avropada hökumət başçısı kürsüsünə oturan ilk müsəlman olduğu vurğulanır.
2014-cü ildən Şotland Milli Partiyasının lideri və birinci nazir olan Nikola Stercen fevralın 15-də istefa vermiş, varisi seçilənə qədər səlahiyyətlərini saxlamışdı.
Parlamentdə çoxluq təşkil edən Şotland Milli Partiyası Şotlandiyanın Böyük Britaniyadan ayrılmasına tərəfdardır.
1707-ci ildən İngiltərə ilə ittifaqda olan Şotlandiya 1997-ci ildə muxtariyyət əldə edib.
2014-cü il sentyabrın 18-də Şotlandiyada ilk müstəqillik referendumu olub, seçicilərin 55,4 faizi Böyük Britaniyanın tərkibində qalmağı üstün bilib.
Uels və Şimali İrlandiya da Böyük Britaniyaya daxildir.
