Partiyalar ələnir
Azərbaycanda rəsmi siyasi partiyalar azalır. Mart ayında 5 qurum fəaliyyətinə son verdiyini açıqlayıb: Azərbaycan Azad Respublikaçılar Partiyası, Azərbaycan Naminə Alyans Partiyası, Azərbaycan Sosial Rifah Partiyası, Azərbaycan Təkamül Partiyası, Birlik Partiyası.
Novator.az bildirir ki, Birlik Partiyası 1992-ci ildən, Azərbaycan Naminə Alyans Partiyası və Azərbaycan Sosial Rifah Partiyası 1995-ci ildən, Azərbaycan Azad Respublikaçılar Partiyası 2002-ci ildən, Azərbaycan Təkamül Partiyası 2005-ci ildən dövlət qeydiyyatında idi.
2023-cü il yanvarın 11-də qüvvəyə minən “Siyasi partiyalar haqqında” yeni qanuna görə, dövlət qeydiyyatı üçün partiyanın azı 5000 üzvü olmalıdır. Dövlət qeydiyyatında olan 60 siyasi partiyaya üzvlərinin sayını 5000 min nəfərə çatdırmaq, onların reyestrini hazırlayıb təqdim etmək üçün 180 gün vaxt verilib. Həmin müddət iyulun 10-da bitir.
Əvvəlki qanunla partiyanın qeydiyyatı üçün 1000 üzv kifayət idi.
Partiyaların dövlət qeydiyyatına Ədliyyə Nazirliyi məsuldur.
