Baş nazir hesabat verib
Milli Məclisin 17 mart iclasında Nazirlər Kabinetinin 2022-ci ildəki fəaliyyəti haqqında hesabat verilib. Hesabatı baş nazir Əli Əsədov təqdim edib. Baş nazir deyib ki, 2022-ci ildə ölkədə 133,8 milyard manatlıq, 2021-ci illə müqayisədə 4,6 faiz çox ümumi daxili məhsul (ÜDM) istehsal olunub: “Qeyri-neft sektorunda 9,1 faiz, qeyri-neft sənayesində 7,1 faiz, kənd təsərrüfatı istehsalında 3,4 faiz artım olub. Əhalinin hər nəfərinə düşən ÜDM 4,1 faiz artaraq 13,3 min manat təşkil edib.
Xarici ticarət dövriyyəsi təxminən 56,2 milyard ABŞ dollarına çatıb. 2021-ci illə müqayisədə xarici ticarət dövriyyəsi 57,7 faiz artıb. Strateji valyuta ehtiyatları 5,3 milyard ABŞ dolları artaraq 58,5 milyard ABŞ dolları təşkil edib və xarici birbaşa dövlət borcunu 8 dəfədən çox üstələyir. 2022-ci ilin sonuna xarici birbaşa dövlət borcunun məbləği 9,5 faiz azalaraq 6,7 milyard ABŞ dolları olub”.
Prezidentin yuxarı icra orqanı olan Nazirlər Kabinetinə baş nazir, müavinləri, nazirlər və başqa mərkəzi icra hakimiyyəti orqanlarının rəhbərləri daxildir.
Əli Əsədov baş nazir postunu 2019-cu il oktyabrın 8-dən tutur.
