Azadlıq çağırışı
AXCP sədri Əli Kərimli məhbus partiyadaşı Zamin Salayevdən yazıb. Novator.az-ın məlumatına görə, siyasətçi qeyd edir ki, aclıq aksiyası ağır ürək xəstəsi olan Zamin Salayevi əldən salıb: “Vəziyyəti çox ağırlaşıb və həyatına böyük təhlükə var, amma ona qarşı qəddarlıq, antiinsani münasibət, qisas əməliyyatı davam edir.
Hamı şahiddir ki, Azərbaycanda bu qədər siyasi məhbusun olması, insan hüquqlarının kütləvi şəkildə tapdalanması ölkəmizin beynəlxalq imicini korlayır. Erməni separatçılar da bu faktlardan bizə qarşı istifadə edirlər. Yəni repressiya, vətəndaşların şərlənib həbs edilməsi təkcə qanunsuzluq və mənəviyyatsızlıq yox, həm də dövlət maraqlarına zidd, antimilli fəaliyyətdir. İnsanları daha da hiddətləndirən antiinsani əməllərdən əl çəkin, Zamin Salayevi azad edin!”
Zamin Salayev AXCP Salyan şöbəsinin sədridir. Martın 15-i Qaradağ Rayon Məhkəməsi onun ev dustaqlığına buraxılması üçün verilmiş vəsatətə baxacaq.
Ev dustaqlığı qətimkan tədbiri yaşayış yerini, müəyyən ərazi hüdudlarını tərk etməmək kimi şərtlər nəzərdə tutur.
Zamin Salayev fevralın 7-si Bakının Lökbatan qəsəbəsində tutulub. Rəsmi iddiaya görə, cəbhəçi həmin gün Sahil qəsəbəsinin sakini Natiq Süleymanova bıçaqla xəsarət yetirib. Cəbhəçi Cinayət Məcəlləsinin silah tətbiq etməklə xuliqanlıqda təqsirli bilinir. Bu ittiham 2 ildən 5 ilədək müddətə azadlıqdan məhrumetmə cəzası nəzərdə tutur. İstintaqı Qaradağ Rayon Polis İdarəsi aparır.
Fevralın 8-də Qaradağ Rayon Məhkəməsi Zamin Salayev barəsində 3 aylıq həbs qətimkan tədbiri seçib. Bakı Apellyasiya Məhkəməsi fevralın 20-də qərarı qüvvədə saxlayıb.
Zamin Salayev ittihamı qəbul etmir, tutulduğu gündən aclıq aksiyası keçirir. Bakı İstintaq Təcridxanasında saxlanan Zamin Salayevin səhhətinin çox ağır olduğu, amma heç bir tibbi yardım almadığı bildirilir.
Cəbhəçi 2020-ci il aprelin 20-dən 2022-ci il yanvarın 19-dək ağır cinayətdə ittiham etməklə böhtan və təhqir ittihamı ilə həbsdə yatıb, siyasi məhbus sayılıb.
AXCP sədri Zamin Salayevdən yazıb
Zamin Salayev: məhkəmə qərar verdi
Zamin Salayev qərarından dönmür
Zamin Salayev 8 kiloqram arıqlayıb
Əli Kərimli: “Biganə qalmamalıyıq”
Zamin Salayev oğluna nədən gileylənib?
