Maaş artımı, pensiya anonsu
Dövlət Statistika Komitəsi 2023-cü il fevralın 1-nə Azərbaycan iqtisadiyyatında muzdla çalışan işçilərin sayını 1 milyon 712,1 min nəfər, onların orta aylıq nominal əməkhaqqını 856,2 manat göstərib. Hesabata görə, yanvarda orta maaş ötən ilin ilk ayına nəzərən 11,8 faiz artıb.
Novator.az bildirir ki, Azərbaycanda bütün pensiyalar orta aylıq nominal əməkhaqqının illik artım tempinə uyğun indeksləşdirilir.
Fevralın 1-dən minimum pensiya 280 manatdır.
Ölkədə kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
Pensiyaya çıxmaq üçün ya 25 il sığorta stajı, ya da minimum pensiya kapitalı (2023-cü il üçün 40320 manat) tələb olunur. 2006-cı il yanvarın 1-dən 2018-ci il iyulun 1-dək hər hansı məbləğdə pensiya kapitalı toplamış şəxsin sosial sığorta stajı avtomatik 25 il hesablanır, əks halda pensiya yaşı çatan şəxsə yaşa görə 220 manat müavinət verilir.
