Gürcüstan dərsi
AXCP sədri Əli Kərimli Gürcüstan olaylarını şərh edib.
Martın 7-də Gürcüstan parlamenti “Xarici təsirin şəffaflığı haqqında” qanun layihəsini ilk oxunuşda qəbul etmişdi. Layihə illik büdcəsinin 20 faizindən çoxu xarici vəsait hesabına formalaşan media quruluşu və qeyri-hökumət təşkilatının xarici təsir agenti sayılmasını nəzərdə tutub. Müxalif qüvvələr, ictimai fəallar, eləcə də beynəlxalq qurumlar layihəni kəskin etirazla qarşılamış, martın 7-8-i paytaxt Tbilisidə etiraz aksiyaları keçirilmişdi. Martın 9-da hakim partiya qanun layihəsini parlamentdən geri çəkməyə məcbur olub.
Gürcüstanda hökuməti parlamentdə çoxluq əldə edən partiya formalaşdırır. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gələrək hökumət qurub.
Novator.az-ın məlumatına görə, Əli Kərimli yazır ki, hakim partiya Gürcüstan cəmiyyətinin etiraz mesajını alaraq geri çəkilib: “Hakim siyasi qüvvə başa düşdü ki, vətəndaş cəmiyyətini və azad mətbuatı Rusiya və Azərbaycan sayağı məhdudlaşdırmaq Gürcüstan üçün ağır nəticələr yaradar, həm ölkə daxilində etiraz hərəkatını gücləndirər, həm də Gürcüstanı qərbli tərəfdaşların dəstəyindən məhrum edər. Gürcüstan hakimiyyəti bu təhlükəni gördü və geriyə addım atdı.
Gürcüstanda baş verənlərdən bizim də çıxarmalı olduğumuz nəticələr var. Azərbaycan hakimiyyəti də tərslik etməməyi, zərərin yarısından da olsa geri dönməyi öyrənməlidir. Xalq olaraq bizlər isə bilməliyik ki, ölkədəki bütün problemlərin həlli hamılıqla dinc mübarizəyə qoşulmaqdan, fəal və məsuliyyətli vətəndaş olmaqdan keçir”.
