Qlobal Bakı Forumu keçirilir
Martın 9-da “Dünya bu gün: çağırışlar və ümidlər” mövzulu Qlobal Bakı Forumu start götürüb. Forum prezident İlham Əliyevin himayəsi, Nizami Gəncəvi Beynəlxalq Mərkəzinin təşkilatçılığı ilə keçirilir.
AZƏRTAC xəbər verir ki, İlham Əliyev açılış mərasimində çıxış edib. Dövlət başçısı Ermənistan-Azərbaycan münaqişəsinə toxunaraq deyib ki, sülh üçün vaxt yetişib. O, 2020-ci ilin Vətən müharibəsindən sonra Azərbaycanın sülh danışıqlarına başlamaq təşəbbüsü irəli sürdüyünü, sülh müqaviləsinin əsasını təşkil edəcək beş prinsip təqdim etdiyini vurğulayıb.
Prezident Azərbaycandakı erməni azlığına mesaj verib: “Azərbaycan çoxkonfessiyalı, çoxmillətli ölkədir. Konstitusiyamız azlıqların hüquqlarını qoruyur. Azərbaycanda real vəziyyətlə tanış olan hər kəs deyə bilər ki, Azərbaycan yüksək dini və etnik dözümlülüyü ilə seçilən, müxtəlif etnik qrupların, konfessiyaların nümayəndələrinin dinc və ləyaqətli şəkildə yaşadığı ölkədir. Bir sözlə, əminəm ki, Azərbaycanın Qarabağ bölgəsində yaşayan ermənilərin həyatı işğal dövründən fərqli olaraq daha yaxşı olacaq. Hər münaqişənin öz tarixi, öz dinamikası və sonu var. Lakin vacib odur ki, ölkələr arasında mübahisələr beynəlxalq hüquq əsasında həll olunsun, onların ərazi bütövlüyü və suverenliyi güc hesabına dəyişdirilməsin”.
Martın 11-dək davam edəcək foruma prezident, baş nazir, spiker və nazirlər, BMT təmsilçiləri, sabiq prezidentlər və sabiq baş nazirlər, 23 ölkənin xarici işlər nazirlərinin müavinləri, ümumilikdə 61 ölkədən 360-dək nümayəndə qatılıb.
