Bir layihə Gürcüstanı qaynadır
Gürcüstanın paytaxtı Tbilisidə etirazlar qismən yatırılıb. Martın 9-na keçən gecə polis parlament binası qarşısında toplaşan fəalları ərazidən sıxışdırıb.
Novator.az bildirir ki, martın 7-də Gürcüstan parlamenti “Xarici təsirin şəffaflığı haqqında” qanun layihəsini ilk oxunuşda qəbul edib. Hökumətin təşəbbüsü olan layihəyə görə, illik büdcəsinin 20 faizindən çoxu xarici vəsait hesabına formalaşan hüquqi şəxs xarici təsir agenti sayılır. Müxalif qüvvələr, ictimai fəallar, eləcə də BMT, Avropa İttifaqı, Avropa Şurası, ABŞ Dövlət Departamenti layihəni kəskin etirazla qarşılayıb. Martın 7-8-də paytaxtda keçirilən etiraz aksiyaları toqquşmalarla müşayiət olunub, ümumilikdə 133 nəfər tutulub.
Ölkə prezidenti Salome Zurabişvili xalq etirazlarını haqlı sayaraq qanunun media quruluşları və qeyri-hökumət təşkilatlarının fəaliyyətini buxovlayacağını, layihəni imzalamayacağını bəyan edib.
Parlament respublikası olan Gürcüstanda hökuməti qanunverici orqanda çoxluq əldə edən partiya formalaşdırır. 2012, 2016 və 2020-ci illərin parlament seçkilərində Gürcü Arzusu – Demokratik Gürcüstan Partiyası qalib gələrək hökumət qurub.
Martın 9-da səhər yayılan məlumata görə, hakim partiya “Xarici təsirin şəffaflığı haqqında” qanun layihəsini parlamentdən geri çəkib.
