REAL-a çağırış
Respublikaçı Alternativ (REAL) Partiyasının sədri İlqar Məmmədov vətəndaşları quruma üzv olmağa çağırıb. O bildirir ki, Realuzv.org saytı partiya üzvü kimi qeydiyyat imkanı verir: “Yaxın aylarda REAL 5 min üzvdən ibarət siyahını hökumətə təqdim etməsə, partiyanın dövlət qeydiyyatı ləğv ediləcək, ölkə daha 30 il indiki hökumətin və onunla doğmalaşmış “əsl müxalifətin” əlində qalacaq. Düzdür, hökumət dünyaya izah etməli olacaq ki, niyə basqı havasını aradan qaldırmadan yeni qanun qəbul edib konstruktiv, əməkdaşlığa hazır, irəliyə baxan siyasi partiyanı vurdu. Amma bu söhbətin faydası olmayacaq, daha bizə səs verə bilməyəcəksiniz, ölkə çox önəmli perspektivləri ilə vidalaşacaq. Bunun qarşısını almağın yolunu bilirsiniz. Özünüz də üzv kimi qeydiyyatdan keçin, yaxın bildiyiniz adamların hər birini də cəlb edin”.
Novator.az bildirir ki, REAL Partiyası 2018-ci ildə Respublikaçı Alternativ Hərəkatının bazasında yaradılıb, 2020-ci ildə dövlət qeydiyyatına alınıb. Qurum Milli Məclisdə 1 deputatla təmsil olunur: Erkin Qədirli.
2023-cü il yanvarın 11-də qüvvəyə minən “Siyasi partiyalar haqqında” yeni qanuna görə, dövlət qeydiyyatı üçün partiyanın azı 5000 üzvü olmalıdır. Dövlət qeydiyyatında olan siyasi partiyalara üzvlərinin sayını 5000 min nəfərə çatdırmaq, onların reyestrini hazırlayıb təqdim etmək üçün 180 gün vaxt verilib. Həmin müddət iyulun 10-da bitir.
Əvvəlki qanunla partiyanın qeydiyyatı üçün 1000 üzv kifayət idi.
Partiyaların dövlət qeydiyyatına Ədliyyə Nazirliyi məsuldur.
