
Azərbaycan rəsmilərinin Yuxarı Qarabağ ermənilərinin nümayəndələri ilə 1 mart görüşündən yeni məlumat yayılıb. Novator.az bildirir ki, erməni nümayəndə heyətinə Samvel Şahramanyanın başçılıq etdiyi açıqlanıb. O, işğalçı rejimdə “Təhlükəsizlik Şurasının katibi”dir. Əvvəllər “Milli Təhlükəsizlik Xidmətinin direktoru”; “hərbi vətənpərvərlik, gənclər, idman və turizm naziri” postlarını tutub.
Azərbaycanın Qarabağ bölgəsində yaşayan erməni sakinlərlə təmaslar üzrə məsul şəxsi deputat Ramin Məmmədovdur. Martın 1-i Ramin Məmmədov Xocalı şəhərində, Rusiya sülhməramlı kontingentinin qərargahında erməni sakinlərin təmsilçiləri ilə görüşüb. Görüşdə Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” şirkətinin mütəxəssislərindən ibarət qrupun rəhbəri Məsim Məmmədov də iştirak edib.
Xəbərə görə, görüşdə Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair ilkin müzakirələr aparılıb.
İşğalçı rejimin martın 3-də yaydığı məlumatda iddia olunur ki, Xocalı görüşündə Yuxarı Qarabağa Ermənistandan təbii qaz və elektrik enerjisi ötürülməsinə maneələrin aradan qaldırılması; Azərbaycan nümayəndələrinin Qızılbulaq qızıl və Dəmirli mis-molibden yataqlarında bir dəfə əyani monitorinq aparmasına imkan yaradılması; Yuxarı Qarabağdan Ermənistana gedən Laçın yolunun tam açılması məsələləri müzakirə olunub.
Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” şirkətinin nümayəndələri keçmiş Ağdərə rayonu ərazisindəki Qızılbulaq qızıl və Dəmirli mis-molibden yataqlarında monitorinq aparmaq istəyir. Bu məsələ Rusiya hərbi qüvvələrinin Xocalıdakı qərargahında komandanlıqla keçirilmiş görüşlərdə müzakirə olunub, ancaq ermənilər Azərbaycan nümayəndələrinin yataqlara baş çəkməsini əngəlləyib. 2022-ci il dekabrın 12-dən azərbaycanlı fəallar Yuxarı Qarabağdan Ermənistana gedən Laçın yolunun Şuşa şəhəri yaxınlığında oturaq aksiya keçirərək Azərbaycan nümayəndələrinin yataqlara baş çəkməsinə şərait yaratmaq tələbi qoyub.
Ramin Məmmədov 1979-cu il fevralın 17-də Mardakert (indiki Ağdərə) şəhərində doğulub, bir müddət Şuşada orta təhsil alıb. Hüquqşünasdır.
Mədəniyyət Nazirliyində mütəxəssis, Xarici Ölkələrdə Yaşayan Azərbaycanlılarla İş üzrə Dövlət Komitəsində mütəxəssis, sədrin köməkçisi, şöbə müdiri, Diasporla İş üzrə Dövlət Komitəsində sədrin köməkçisi, Aparat rəhbərinin müavini, sədrin müavini vəzifələrini tutub.
Milli Məclisin 64 saylı Sabirabad dairəsindən deputatıdır.
1988-ci ildə ermənilər Azərbaycanın Dağlıq (Yuxarı) Qarabağ vilayətinin Ermənistana verilməsi tələbi ilə separatçı hərəkata başlayıb, bu, getdikcə vüsət alaraq Ermənistanın açıq təcavüzünə çevrilib.
1991-ci ildə ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-ci ildə elan olunan atəşkəsə qədər Ermənistan Azərbaycanın bütün cənub-qərbini ələ keçirib.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalçı rejimin əlindədir. Həmin ərazilərə və bölgədən Ermənistana gedən Laçın yoluna Rusiyanın hərbi kontingenti nəzarət edir.