Ukrayna qətnaməsi: Azərbaycan səsvermədən yayınıb
BMT Baş Məclisinin 23 fevral iclasında Ukrayna qətnaməsi qəbul edilib. Tövsiyə xarakterli qətnamədə işğalçı Rusiyadan hərbi əməliyyatları dayandıraraq qoşunlarını Ukrayna ərazisindən tam çıxarmaq tələb olunur. Novator.az bildirir ki, BMT-nin əksər üzvü, o cümlədən Estoniya, Latviya, Litva, Moldova, Ukrayna, Gürcüstan, Türkiyə sənədin lehinə, bir neçə üzvü, o cümlədən Belarus, Rusiya əleyhinə səs verib.
Bəzi ölkələr, o cümlədən Ermənistan, İran, Qazaxıstan, Özbəkistan, Qırğızıstan, Tacikistan bitərəf qalıb, bir neçə dövlət, o cümlədən Azərbaycan və Türkmənistan səsvermədən yayınıb.
1945-ci ildə yaradılan BMT 193 ölkəni bir araya gətirir. Qurumun mərkəzi qərargahı ABŞ-ın Nyu-York şəhərində yerləşir.
Rusiya 2014-cü ildə Ukraynanın Krım yarımadasını tutaraq Krım Respublikası və Sevastopol şəhəri adları ilə özünə birləşdirib, Donetsk və Luqansk vilayətlərinin bir hissəsində işğalçı rejimlər qurub.
2022-ci il fevralın 21-də Rusiya Donetsk və Luqansk rejimlərini “müstəqil dövlətlər” kimi tanıyıb, fevralın 24-dən Ukraynada total hərbi əməliyyatlar apararaq ölkənin cənub-şərq bölgəsini ələ keçirib.
Sentyabrın 29-da Rusiya Zaporojye və Xerson vilayətlərini “suveren və müstəqil” subyektlər kimi tanıyıb, oktyabrın 5-də həmin bölgələri, eləcə də Donetsk və Luqansk vilayətlərini özünə birləşdirdiyini açıqlayıb.
Rusiyanın Ukraynada apardığı işğalçı müharibə dinc əhali arasında kütləvi qırğınlar, zorakılıq, qarət, hərbi xarakter daşımayan infrastrukturun, yaşayış məntəqələrinin qəsdən dağıdılması və başqa cinayətlərlə müşayiət olunur.
