“Qarabağ”ın 4 rəqibi mübarizədə qalır
UEFA-nın klub turnirlərinin 2022-2023 mövsümündə “Qarabağ”a rəqib olmuş komandaların 4-ü mübarizəni davam etdirir. Novator.az bildirir ki, onların 2-si Avropa Liqasında, 2-si Konfrans Liqasında yer alır.
Mövsümə Çempionlar Liqasında başlayan “Qarabağ” Polşanın “Lex” (5:1, 0:1), İsveçrənin “Sürix” (3:2, 2:2), Macarıstanın “Ferensvaroş” (1:1, 3:1) komandalarını ələyib, Çexiyanın “Viktoriya” (0:0, 1:2) komandasına yenilərək Avropa Liqasına adlayıb.
Hazırda “Lex” Konfrans Liqasının, “Ferensvaroş” Avropa Liqasının 1/8 finalındadır.
Avropa Liqasının G qrupunda “Qarabağ” Almaniyanın “Frayburq” (1:1, 1:2), Fransanın “Nant” (3:0, 1:2), Yunanıstanın “Olimpiakos”(0:0, 3:0) komandalarına rəqib olub, üçüncü yeri tutaraq Konfrans Liqasına köçüb.
“Frayburq” Avropa Liqasının 1/8 finalındadır.
Konfrans Liqasının 1/16 finalında “Qarabağ” Belçikanın “Gent” komandasını keçə bilməyib (1:0, 0:1 (3:5).
