İŞİD əməliyyatı: Salahov qardaşları tutulub
Dövlət Təhlükəsizliyi Xidmətinin 24 fevral məlumatına görə, İŞİD terror təşkilatının üzvləri tutulub: “Müəyyən edilib ki, Azərbaycan vətəndaşı Mircavad Seyidağa oğlu Salahov Suriyanın Raqqa şəhərində İŞİD sıralarına qoşularaq xüsusi təlim düşərgəsinə göndərilib, döyüş təlimlərində iştirak etməklə odlu silahdan istifadə qaydalarına yiyələnib. Sonra o, terror təşkilatında mühasib kimi fəaliyyətə başlayıb, silahlı münaqişələrdə iştirak edən təşkilat üzvlərinə və onların ailələrinə aylıq pul vəsaitləri və ərzaq təminatının verilməsi, yaralanmış və həlak olmuş şəxslərin ailələrinə maddi yardımların ayrılması işinin təşkili istiqamətində fəaliyyət göstərib, cinayət məsuliyyətindən yayınmaq məqsədilə bir müddət başqa ölkələrdə gizlənib. Mircavad Salahovu İŞİD terror təşkilatına qardaşı Mircəlal Salahovun cəlb etdiyi bilinib. Mircəlal Salahov təşkilatın Suriyada apardığı hərbi əməliyyatlarda iştirak edərək yaralanıb”.
Məlumatda qeyd olunur ki, Mircavad Salahov Cinayət Məcəlləsinin 214-1-ci (terrorçuluğu maliyyələşdirmə) və 283-1.3-cü (ölkə hüdudlarından kənarda silahlı münaqişələrdə iştirak etmə), Mircəlal Salahov Cinayət Məcəlləsinin 281-1.1 və 283-1.3-cü (ölkə hüdudlarından kənarda silahlı münaqişələrə cəlb etmə və belə silahlı münaqişələrdə iştirak etmə) maddələri ilə məsuliyyətə alınaraq həbs ediliblər.
