İki rəsmi qəzetin formatı dəyişib
Azərbaycanın dörd rəsmi gündəlik qəzetinin ikisi formatını dəyişib. Novator.az bildirir ki, “Xalq qəzeti” və “Bakinski raboçi” fevralın 23-dən B:2 (yığcam) formatda çıxırlar. Hər iki qəzetin təsisçiləri Prezidentin İşlər İdarəsi və redaksiya kollektivləridir. Eyni statusda olan “Respublika” qəzeti və Milli Məclisin nəşr etdiyi “Azərbaycan” qəzeti A:2 (böyük) formatda qalırlar.
Dünyada geniş yayılan B:2 formatını Azərbaycana 2005-ci ildə “Gün səhər” qəzeti gətirib, sonradan “Exo” qəzeti həmin formata keçib.
Hazırda ölkənin bir neçə gündəlik nəşrinin, o cümlədən hakim partiyanın təsis etdiyi “Yeni Azərbaycan” qəzetinin formatı B:2-dir.
