Elektroenergetika qanunu ilk oxunuşdan keçdi
Milli Məclisin 24 fevral iclasında “Elektroenergetika haqqında” qanun layihəsi ilk oxunuşdan keçib. Layihəyə görə, qanun elektrik enerjisinin istehsalı, saxlanması, ötürülməsi, paylanması, təchizatı, idxalı, ixracı və istehlakı ilə bağlı elektroenergetika subyektləri, istehlakçılar və elektroenergetika sektorunda fəaliyyət göstərən dövlət orqanları (qurumları) arasında yaranan münasibətləri tənzimləyir, elektroenergetikanın hüquqi, iqtisadi və təşkilati əsaslarını müəyyən edir.
Elektroenergetika sektorunda bazar münasibətləri bu qaydalarla tənzimlənir: topdansatış bazarı qaydaları; balanslaşdırma qaydaları; kommersiya uçotu qaydaları; pərakəndə satış bazarı qaydaları; ötürücü və paylayıcı sistem operatorlarının elektrik enerjisi itkilərinin hesabat dövrü üçün normativ göstəricilərinin müəyyənləşdirilməsi qaydası; elektrik enerjisi bazarının monitorinqi qaydası.
Sektorda bu işlər icazələr əsasında həyata keçirilir: su elektrik stansiyaları və biokütlədən alınan qaz və ya digər yanacaq növü vasitəsilə elektrik və istilik enerjisi istehsal edən elektrik stansiyalarında elektrik enerjisinin istehsalı üzrə 500 kilovatdan, digər hallar üzrə isə 150 kilovatdan yuxarı elektrik enerjisinin istehsalı; elektrik enerjisinin ötürülməsi; elektrik enerjisinin paylanması; 150 kilovatdan yuxarı elektrik qurğularının istismarı; elektrik enerjisinin idxalı və ixracı.
Elektrik enerjisinin ötürülməsinə və elektrik enerjisinin paylanmasına icazə hüquqi şəxslərə, elektrik enerjisinin istehsalına icazə isə hüquqi və ya fiziki şəxslərə verilir.
Qanunun 2024-cü il yanvarın 1-dən (bəzi maddələrin 2025-ci il iyulun 1-dən və 2028-ci il iyulun 1-dən) qüvvəyə minməsi nəzərdə tutulur.
