17 ölkə, 48 komanda
UEFA-nın klub turnirlərində 2022-2023 mövsümü 1/8 final raundlarındadır. Novator.az bildirir ki, mübarizəni 17 ölkənin 48 komandası davam etdirir: Çempionlar Liqası, Avropa Liqası və Konfrans Liqasının hər birində 16 komanda var.
Çempionlar Liqasındakı komandaların 9-u titul sahibidir. 1955-ci ildən keçirilən, 1992-ci ilə qədər Çempionlar kuboku adlanmış turnirdə “Real” 14, “Milan” 7, “Bavariya” və “Liverpul” 6, “İnter” (İtaliya) 3, “Benfika”, “Portu” və “Çelsi” 2, “Borussiya” (Dortmund) 1 zəfər qazanıb.
Avropa Liqasındakı 6 komandanın turnirdə qələbəsi var. 1971-ci ildən keçirilən, 2009-cu ilədək UEFA kuboku adlanmış turnirdə “Sevilya” 6, “Yuventus” 3, “Feyenoord” 2, “Bayer”, “Şaxtyor” (Ukrayna) və “Mançester Yunayted” 1 uğur əldə edib.
2021-ci ildən keçirilən Konfrans Liqasının yeganə qalibi “Roma” Avropa Liqasında yarışır.
Mövsümdə təmsilçisi qalmayan Azərbaycan 55 üzvü olan UEFA-nın klub reytinqində 29-cu yerdədir. Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, sonrakı raundlarda qələbə 2 xal, heç-heçə 1 xaldır.
Qrup mərhələsi və sonrakı raundlar üçün 1-5 arası bonus xalları da var.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
2022-2023 mövsümündə Azərbaycan 4,000 əmsal əldə edib.
