Məhbus cəbhəçinin saxlanma şəraiti bir az yaxşılaşıb
Məhbus AXCP üzvü Mütəllim Orucov aclıq aksiyasını dayandırıb. Fevralın 21-də Novator.az-a danışan vəkil Nemət Kərimli deyib ki, cəbhəçi Bakının Şüvəlan qəsəbəsindəki 3 saylı İstintaq Təcridxanasında saxlanma şəraitinin qismən yaxşılaşmasını nəzərə alaraq aclığa son verib.
Mütəllim Orucov saxlanma şəraitinin ağır olduğunu bəyan edərək fevralın 12-də aclıq aksiyasına başlamışdı.
2021-ci il iyunun 1-də Almaniyadan deportasiya olunan cəbhəçi həmin il oktyabrın 22-də Qubada tutularaq Bakıya gətirilib, satış məqsədi ilə qanunsuz olaraq külli miqdarda narkotik vasitə saxlama ittihamı ilə həbs edilib. 2022-ci il oktyabrın 21-də Sumqayıt Ağır Cinayətlər Məhkəməsi ona 7 il müddətinə azadlıqdan məhrumetmə cəzası kəsib. Sumqayıt Apellyasiya Məhkəməsi hökmdən verilən şikayətə baxır.
Mütəllim Orucov ittihamı qəbul etmir və siyasi sifariş sayır. Bir neçə il Almaniyada yaşamış Mütəllim Orucov orada Azərbaycandakı siyasi məhbusların müdafiəsinə həsr olunmuş etiraz aksiyalarında fəal iştirakı ilə tanınıb.
