Konstitusiya Məhkəməsindən iddia müddəti şərhi
Konstitusiya Məhkəməsinin Plenumu Mülki Məcəllənin 372.1, 373.1, 373.3, 551.1, 551.2.1 və 553.1.1-ci maddələrini Azərbaycan Konstitusiyasının 60-cı maddəsi (Hüquq və azadlıqların inzibati və məhkəmə təminatı) baxımından şərh edib. Sumqayıt Apellyasiya Məhkəməsinin müraciəti əsasında çıxarılan qərarda qeyd olunur ki, Mülki Məcəllənin 27-ci fəslinin 5-ci paraqrafı (Müddətin keçməsinə görə öhdəliyin xitamı) ilə müəyyən edilmiş müddətlər hüquqi təbiəti baxımından iddia müddətləridir, qanunverici orqan həmin paraqrafı təkmilləşdirənədək öhdəliklərdən, o cümlədən vaxtaşırı ödəmələrdən irəli gələn tələblərə münasibətdə məcəllənin 18-ci fəsli (İddia müddəti) ilə nəzərdə tutulmuş iddia müddətləri tətbiq edilməlidir.
Mülki Məcəllədən çıxarış:
Maddə 372.1. Başqa şəxsdən hər hansı hərəkəti yerinə yetirməyi və ya yerinə yetirməkdən çəkinməyi tələb etmək hüququna müddət şamil edilir.
Maddə 373.1. Ümumi iddia müddəti on il təşkil edir.
Maddə 373.3. Vaxtaşırı icra edilməli öhdəliklərdən irəli gələn tələblər üzrə iddia müddəti üç ildir.
Maddə 551.1. Əgər bu Məcəllə ilə ayrı qayda müəyyənləşdirilməyibsə, bütün tələblər on il (adi müddət) keçdikdən sonra qüvvəsini itirir.
Maddə 551.2. Aşağıdakı tələblər beş il keçdikdən sonra qüvvəsini itirir:
551.2.1. kirayə haqqı, icarə haqqı, kapital üçün faizlər və digər vaxtaşırı ödənişlər haqqında tələblər;…
Maddə 553.1. Aşağıdakı hallarda müddətin axımı kəsilir:
553.1.1. mükəlləfiyyətli şəxs tələbi ixtiyarlı şəxsə hissə-hissə ödənişlərlə, faizlər ödəməklə, təminat verməklə və ya digər üsulla icra edirsə;…
