Münhen səfəri
AZƏRTAC xəbər verir ki, prezident İlham Əliyev 59-cu Münhen Təhlükəsizlik Konfransında iştirak etmək üçün Almaniyada səfərdədir. Fevralın 17-də dövlət başçısı Münhendə Almaniyanın Şərqi Biznes Assosiasiyasının baş icraçı direktoru Mixael Harmsla görüşüb.
Dövlət başçısı “Boru arzuları: gələcəyə uyğun enerji təhlükəsizliyi” mövzusunda dəyirmi masaya da qatılıb. Ölkənin Avropanın enerji təhlükəsizliyinə verdiyi töhfədən danışan prezident deyib ki, hədəf Cənub Qaz Dəhlizinin genişləndirilməsidir, 2027-ci ilədək TAP-la qaz nəqlinin indiki 11 milyard kubmetrdən 20 milyard kubmetrə, TANAP-la isə 16 milyard kubmetrdən 31 milyard kubmetrə çatdırılması nəzərdə tutulur.
Azərbaycanla Avropa İttifaqı arasında əməkdaşlıqda bərpa olunan enerjinin xüsusi rolunun olduğunu deyən İlham Əliyev ölkənin son dövrlər bu sahədə bir sıra vacib addımlar atdığını diqqətə çatdırıb.
Münhen Təhlükəsizlik Konfransının əsası 1962-ci ildə qoyulub. Hər il keçirilən konfransın təşkilinə Almaniya hökuməti məsuldur.
