Sabiq nazir axtarışa verildi
Ermənistanın sabiq müdafiə naziri Vigen Sərkisyan axtarışa verilib. Xəbəri fevralın 16-da ölkənin Baş Prokurorluğu yayıb.
Vigen Sərkisyan 2018-ci ildən ABŞ-da yaşayır. Fevralın 8-də Baş Prokurorluq onu cinayət məsuliyyətinə cəlb edib, ardınca paytaxt Yerevanda ilkin məhkəmə həbs qətimkan tədbiri seçilməsi qərarı çıxarıb.
İttihama əsasən, Vigen Sərkisyan 2018-ci ildə vəzifə səlahiyyətlərini aşaraq Yerevanda hərbi qulluqçular üçün tikilmiş çoxmərtəbəli binadakı 26 mənzilin ev növbəsində olmayan hərbçilərə, 3 mənzilin isə mülki şəxslərə verilməsini əmr edib. İş üzrə Müdafiə Nazirliyinin müvafiq komissiyasının 5 üzvü də ittiham olunur.
Novator.az bildirir ki, 1975-ci il təvəllüdlü Vigen Sərkisyan 2016-cı ilin oktyabrından 2018-ci il mayınadək müdafiə naziri olub.
O, 1995-1998-ci illərdə Ermənistan parlamenti sədrinin köməkçisi, 2003-2009-cu illərdə Ermənistan prezidentinin köməkçisi, 2009-2011-ci illərdə Prezident Administrasiyası rəhbərinin müavini vəzifələrini tutub, 2011-ci ildən Prezident Administrasiyasına rəhbərlik edib.
2000-2003-cü illərdə müdafiə nazirinin referenti kimi hərbi xidmət keçib.
