Moldovada yeni kabinet rəsmiləşdi
Fevralın 16-da Moldova parlamenti yeni hökumətin tərkibini təsdiqləyib, ardınca baş nazir Dorin Reçan və kabinet üzvləri prezidentin hüzurunda and içərək səlahiyyətlərini rəsmiləşdiriblər.
Novator.az bildirir ki, 1974-cü il təvəllüdlü Dorin Reçan partiyasızdır. 2010-2012-ci illərdə rabitə və informasiya texnologiyaları nazirinin müavini, 2012-2015-ci illərdə daxili işlər naziri olub, 2022-ci ildən Təhlükəsizlik Şurasının katibi idi.
Əvvəlki baş nazir Natalya Qavrilitsa fevralın 10-da istefa vermiş, prezident Mayya Sandu hökumətə rəhbərlik üçün Dorin Reçanın namizədliyini irəli sürmüşdü.
Moldova parlament respublikasıdır, hökuməti 101 yerlik qanunverici orqanda mandatların yarıdan çoxuna sahib olan partiya qurur. Hakim Hərəkət və Həmrəylik Partiyasının təmsilçisi olan Natalya Qavrilitsa baş nazir postunu 2021-ci il avqustun 6-dan tuturdu.
2020-ci ildən prezidentlik edən Mayya Sandu da Hərəkət və Həmrəylik Partiyasının təmsilçisidir.
