Güvənməməyin zirvəsi
Milli Məclisin regional məsələlər komitəsinin 15 fevral iclasında Ədliyyə Nazirliyinin Bələdiyyələrlə İş Mərkəzinin illik məruzəsi təqdim olunub. Novator.az-ın məlumatına görə, vətəndaş cəmiyyəti eksperti Rövşən Ağayev yazır ki, iclasda çıxış edən ədliyyə nazirinin müavini Vilayət Zahirov bələdiyyələrə birdən-birə böyük səlahiyyətlərin verilməsinin yanlış olacağını deyib: “Düz deyir, bələdiyyələr cəmi 25 ildir yaranıb, hələ cavandırlar, qocalıb 50 yaşına çatsınlar, təcrübə toplasınlar, icra hakimiyyətlərinin iməcliklərində işləməkdən belləri tamam əyilsin, ahıl yaşlarına çatanda səlahiyyət görəcəklər.
Yerli özünüidarə vətəndaşın praktikada real hakimiyyət qazandığı bir sistemdir – özü seçir, idarəetmədə bilavasitə iştirak edir, qərar verir, hansısa lokal probleminin həlli üçün paytaxtdan prezident səviyyəsində illərlə qərar gözləmir. Bələdiyyəyə etimadsızlıq vətəndaşa güvənməməyin zirvəsidir.
Avropa İttifaqının ekspertləri qitə üzrə bələdiyyələrin inkişafına dair indeks hazırlayıb. Reytinqə Avropa Şurasına üzv ölkələrdən tək Azərbaycan daxil edilməyib. Aydındır, reallıqda mövcud olmayan bir institutu inkişaf edən sistemlərin içərisinə niyə əlavə etsinlər? Bu reytinqi görəndə utanmalı olanların da əvəzinə utanırsan”.
Azərbaycanda bələdiyyə institutu 1999-cu ildən fəaliyyət göstərir. Yerli özünüidarə qurumlarına seçkilər 1999, 2004, 2009, 2014 və 2019-cu illərdə keçirilib.
Hazırda 1606 bələdiyyə var, ancaq onların yerli hakimiyyət statusu yoxdur. Yerlərdə (rayon və şəhərlərdə) icra hakimiyyətini icra başçıları həyata keçirir. Onların təyinatı prezidentinin səlahiyyətindədir. Qəsəbə və kəndlərdə icra başçılarının nümayəndələri fəaliyyət göstərir.
