Boş dairələrin sorğusu
Konstitusiyanın 109-cu maddəsinə görə, Milli Məclisə seçkilərin təyinatı prezidentin səlahiyyətindədir. Respublikaçı Alternativ Partiyasının sədri İlqar Məmmədov buna diqqət çəkərək yazır ki, Seçki Məcəlləsi deputat mandatının boş qalmasından sonra bir ay müddətində əlavə seçkinin təyin olunmasını hökm edir: “Prezident İlham Əliyev Seçki Məcəlləsinin həmin tələbini birbaşa pozur. Deputat yeri boşalmış dairələrdə bir ay müddətində əlavə seçkilər təyin edilməli idi, amma indiyədək belə sərəncam olmayıb.
Dövlət başçısı deputatın seçilmədiyi dairələr üzrə Seçki Məcəlləsinin və konstitusiyanın hərfini pozmasa da, onların ruhuna uyğun hərəkəti etmir. O dairələrdə də seçkilər çoxdan təyin edilməli idi”.
Novator.az bildirir ki, 125 nəfərlik Azərbaycan parlamentinin hazırda 118 deputatı var. Milli Məclisə son seçki 2020-ci il fevralın 9-da keçirilib. Mərkəzi Seçki Komissiyasının 13 fevral 2020-ci il qərarları ilə 33 saylı Xətai, 35 saylı Xətai, 74 saylı Lənkəran kənd və 80 saylı İmişli-Beyləqan dairələri üzrə nəticələr ləğv olunub.
Seçki etibarsız sayıldığı halda təkrar seçki keçirilməlidir. Ancaq buna gedilməyib.
116 saylı Qəbələ dairəsindən deputat Fəttah Heydərov 2020-ci il avqustun 4-də vəfat edib.
55 saylı Xaçmaz şəhər dairəsindən deputat Eldəniz Səlimov 2021-ci il avqustun 3-də həbs edilib, hazırda 3 il 6 aylıq azadlıqdan məhrumetmə cəzası çəkir. Cəza hökmü 2022-ci il fevralın 28-də qanuni qüvvəyə minib və Eldəniz Səlimov mandatını itirib.
50 saylı Abşeron-Qobustan dairəsindən deputat Şahin Seyidzadə dövlət orqanlarında vəzifəyə keçdiyi üçün Mərkəzi Seçki Komissiyasının 17 mart 2022-ci il iclasında onun mandatına xitam verilib.
Deputat mandatı boş qalanda əlavə seçki təyin edilməlidir. Ancaq bu da baş verməyib.
