Ali Məhkəmədən Abid Qafarov qərarı
Fevralın 16-da Ali Məhkəmə KİM TV internet kanalının qurucusu Abid Qafarovun şikayəti üzrə yekun qərar verib. Vəkil Aqil Layicin yaydığı məlumata görə, iş apellyasiya baxışına qaytarılıb: “Bəraət gözləyirdik, olmadı. Beləliklə, Abid bəyin əsassız və qanunsuz həbsi süni şəkildə uzadılır”.
Novator.az bildirir ki, 1981-ci il təvəllüdlü Abid Qafarov Azərbaycan Dövlət Neft və Sənaye Universitetini bitirib. İctimai fəaliyyəti, jurnalist araşdırmaları ilə tanınıb.
Yasamal Rayon Məhkəməsi 2022-ci il iyulun 13-də Abid Qafarovu bir qrup qaziyə böhtan atmaq və onları təhqir etməkdə təqsirli bilərək 1 il müddətinə azadlıqdan məhrum edib. Abid Qafarov məhkəmə zalında tutulub.
İkinci Qarabağ müharibəsi qazilərinin xüsusi ittiham qaydasında şikayətlərində Abid Qafarovun KİM TV-də müharibə veteranlarını öz hüquqları uğrunda mübarizə aparmamaqda, çarəsizlikdən ağızlarını tikməkdə, özlərini yandırmaqda, itaətkarcasına davranmaqda qınadığı əsas gətirilib.
Avqustun 30-da Bakı Apellyasiya Məhkəməsi cəzanı qüvvədə saxlamış jurnalist bəraət istəyi ilə Ali Məhkəməyə üz tutmuşdu.
Abid Qafarov azadlıqdan məhrum edildi
